भारताविरुद्धच्या पहिल्याच कसोटी सामन्यात इंग्लंडचा कर्णधार जो रुट एकामागून एक विक्रम रचत चालला आहे. या सामन्यात रुटने द्विशतक पूर्ण केले आणि एका विशअवविक्रमाला गवसणी घातली आहे. त्यानं सुनील गावस्कर यांचा ( १९८०) १६६ धावांचा विक्रम मोडला.
रुट आपला शंभरावा कसोटी सामना खेळत आहे. या शंभराव्या कसोटी सामन्यात सर्वाधिक धावा करण्याचा विश्वविक्रम रुटने रचला आहे. यापूर्वी हा विक्रम पाकिस्तानचा फलंदाज इंझमाम उल हकच्या नावावर होता. इंझमामने आपल्या शंभराव्या कसोटी सामन्यात १८४ धावा केल्या होत्या. पण रुटने आपल्या शंभराव्या कसोटीत द्विशतक झळकावले.
रुटने चेन्नईत शतक करण्याआधी श्रीलंकेविरुद्धच्या कसोटी मालिकेत त्याने पहिल्या कसोटीच्या पहिल्या डावात २२८ तर दुसऱ्या कसोटीत १८६ धावा केल्या होत्या. पहिल्या दिवशी रूटने शतक झळकावले. रुटचे ही १००वी कसोटी आहे. १००व्या कसोटीत शतक करणारा तो नववा खेळाडू ठरला. त्याच बरोबर ९८, ९९ आणि १००व्या कसोटीत शतक करणारा जो रूट हा जगातील पहिला क्रिकेटपटू ठरला होता. सामन्याच्या दुसऱ्या दिवशी रुटने दीड शतक पूर्ण केले. रुटचे कसोटी क्रिकेटमधील सलग तिसरे दीड शतक ठरले.
कसोटी क्रिकेटमध्ये अशी कामगिरी करणाऱ्या फलंदाजांच्या यादीत रुट आता सातव्या स्थानावर पोहोचला आहे. या यादीत श्रीलंकेचा कुमार संगकारा पहिल्या स्थानावर आहे. त्याने २००७ साली सलग चार वेळा १५० हून अधिक धावा केल्या. दुसऱ्या क्रमांकावर विली हेमंड असून त्यांनी १९२८-२९ मध्ये तीन वेळा अशी कामगिरी केली. दिग्गज फलंदाज डॉन ब्रॅडमन (१९३७), जहीर अब्बास (१९८२-८३) तर न्यूझीलंडचा टॉम लॅथम (२०१८-१९) यांनी प्रत्येकी ३ वेळी अशी कामगिरी केली आहे. श्रीलंकेविरुद्ध आणि आता भारताविरुद्धच्या पहिल्या कसोटीत रुटने धमाकेदार फलंदाजी केली आहे. चेन्नईत सुरू असलेल्या पहिल्या कसोटीत रुटने पहिल्या दिवशी शतक तर दुसऱ्या दिवशी द्विशतक पूर्ण केले. त्यामुळे आता रुट या सामन्यात त्रिशतकाला गवसणी घालणार का, याची उत्सुकता चाहत्यांना नक्कीच असेल.
