सरपंच देशमुख हत्या प्रकरणाला नवे वळण; विजयसिंह बांगरच्या जबाबात धक्कादायक नावे !

बीड : वृत्तसंस्था

जिल्ह्यातील मस्साजोग गावचे सरपंच संतोष देशमुख यांची हत्या झाल्यानंतर संपूर्ण महाराष्ट्रात संतापाची लाट पसरली होती. या प्रकरणातील मुख्य आरोपी वाल्मिक कराड सध्या जेलमध्ये असून, त्याच्यावर परळीतील व्यापारी महादेव मुंडे यांच्या हत्येचा देखील आरोप आहे.

आता या प्रकरणात एक नवा वळण समोर आले आहे. सूत्रांकडून मिळालेल्या माहितीनुसार, विजयसिंह उर्फ बाळा बांगर यांचा 164 नुसार दिलेला गोपनीय जबाब महत्त्वाचा ठरत आहे. या जबाबात त्याने फक्त वाल्मिक कराडच नव्हे, तर त्याच्या मुलाचं नावही घेतलं असल्याचे समोर आले आहे.

महादेव मुंडे यांच्या पत्नी ज्ञानेश्वरी मुंडे यांच्या उपस्थितीत नोंदवण्यात आलेल्या या जबाबामुळे, एसआयटीच्या तपासात नवीन धक्कादायक माहिती मिळण्याची शक्यता आहे. सूत्रांनी सांगितले की, हा जबाब प्रकरणातील पुढील कारवाईसाठी निर्णायक ठरू शकतो आणि वाल्मिक कराड तसेच त्याच्या मुलाच्या अडचणींमध्ये लक्षणीय वाढ होऊ शकते.

दरम्यान, या प्रकरणातील दोन संशयितांची नार्को टेस्ट आज करण्यात आली असून, या चाचणीचे निकाल एसआयटीच्या पुढील कारवाईसाठी महत्त्वाचे ठरतील. सध्या वाल्मिक कराड जेलमध्ये असल्याने, या नवनिर्मित घडामोडींमुळे त्याच्या अडचणी अधिक वाढण्याची शक्यता आहे. तसेच, या प्रकरणातील पुढील तपास आणि न्यायालयीन कारवाईवर सर्वांचे लक्ष लागले आहे.