शेगावात भक्तीचा महासागर; गजानन महाराज प्रकट दिनानिमित्त ७५०हून अधिक दिंड्यांची हजेरी !

शेगाव :  वृत्तसंस्था 

संत श्री गजानन महाराज यांच्या १४८ व्या प्रकट दिन महोत्सवानिमित्त शेगाव नगरीत भक्तीचा अक्षरशः महासागर लोटला आहे. गेल्या वर्षीच्या तुलनेत यंदा भजनी दिंड्यांच्या संख्येत लक्षणीय वाढ झाली असून, आतापर्यंत ७५० हून अधिक दिंड्या शेगावात दाखल झाल्या आहेत. दिंड्या येण्याचा ओघ अद्याप सुरूच असल्याने ही संख्या आणखी वाढण्याची शक्यता वर्तविण्यात येत आहे.

मागील वर्षी २०२५ मध्ये श्रींच्या १४७ व्या प्रकट दिनानिमित्त सुमारे ७०० भजनी दिंड्यांनी शेगाव गाठले होते. मात्र यंदा ७ फेब्रुवारीच्या सायंकाळपर्यंतच दिंड्यांची संख्या ७५० च्या पुढे गेली असून, भाविकांचा उत्साह दुपटीने वाढलेला दिसून येत आहे. गतवर्षी सुमारे १ लाख भाविकांनी श्रींचे दर्शन घेतले होते. यंदा दर्शनासाठी दाखल होणाऱ्या भाविकांची संख्या जवळपास दुपटीने वाढण्याचा अंदाज व्यक्त करण्यात येत आहे.

२ फेब्रुवारीपासून सुरू झालेल्या प्रकट दिन महोत्सवात दररोज काकडा, भजन, प्रवचन, हरिपाठ व कीर्तनाचे आयोजन करण्यात आले आहे. उद्या शनिवार (दि. ८) रोजी दुपारी १२ वाजता मुख्य प्रकट दिन सोहळा होणार असून, सकाळी १० ते दुपारी २ या कालावधीत दर्शनासाठी भाविकांची सर्वाधिक गर्दी होण्याची शक्यता आहे. यानुसार प्रशासन व संस्थानकडून आवश्यक नियोजन करण्यात आले आहे.

दरम्यान, भाविकांची वाढती गर्दी लक्षात घेता शेगावातील भक्तनिवास व्यवस्था सध्या पूर्णतः भरलेली आहे. संस्थानचे आनंद विहार, विसावा तसेच इतर मोठे भक्तनिवास हाऊसफुल्ल झाले असून, मुक्कामासाठी जागा मिळणे कठीण झाले आहे. त्यामुळे अनेक भाविकांनी पर्यायी निवासस्थाने शोधण्यास सुरुवात केली आहे.