नवी दिल्ली : वृत्तसंस्था
देशातील कोलकाता येथील प्रशिक्षणार्थी डॉक्टरच्या बलात्कार-हत्येप्रकरणी भाजपने आज सकाळी 6 वाजल्यापासून 12 तासांच्या बंदची हाक दिली आहे. 27 ऑगस्टच्या नबन्ना मोर्चात सहभागी झालेल्या विद्यार्थी आंदोलकांना ताब्यात घेतल्याचा निषेध भाजप करत आहे. पक्षाने याला ‘बांगला बंद’ असे नाव दिले आहे. भाजपचे नेते आणि कार्यकर्ते रस्त्यावर उतरले आहेत.
पोलिसांनी अलीपुरद्वारमधील भाजप कार्यकर्त्यांना ताब्यात घेतले आहे. उत्तर 24 परगणा येथील बनगाव स्थानकावर भाजप आमदार अशोक कीर्तनिया यांच्या नेतृत्वाखाली कार्यकर्त्यांनी ट्रेन अडवली. कूचबिहारमध्ये सरकारी बस चालक हेल्मेट घालून गाडी चालवताना दिसले. विधाननगरमध्ये दुकाने बंद होती.
बंगाल सरकारने भाजपच्या बंदला विरोध केला आहे. मुख्यमंत्री ममता बॅनर्जी यांचे मुख्य सल्लागार अलपान बंदोपाध्याय म्हणाले की सरकार बुधवारी (28 ऑगस्ट) कोणत्याही बंदला परवानगी देणार नाही. यामध्ये लोकांनी सहभागी होऊ नये, असे आवाहन करण्यात आले आहे. सरकारने सरकारी कर्मचाऱ्यांसाठी अधिसूचनाही जारी केली आहे. 28 ऑगस्ट रोजी कोणत्याही सरकारी कर्मचाऱ्याला प्रासंगिक रजा दिली जाणार नाही, असे त्यात म्हटले आहे. तसेच दिवसभर कोणाचीही रजा मंजूर केली जाणार नाही. 27 ऑगस्टला रजेवर गेलेल्या कर्मचाऱ्यांना 28 ऑगस्टला कामावर परतावे लागणार आहे. कोणी रजेवर असेल तर एक दिवसाचा पगार कापला जाईल.
