पुणे : वृत्तसंस्था
ज्येष्ठ नेते व खासदार शरद पवार यांची प्रकृती अचानक बिघडल्याची माहिती समोर आली आहे. सध्या ते बारामतीत असताना त्यांना ताप, खोकला आणि कफचा त्रास जाणवत असल्याने पुढील उपचारासाठी त्यांना पुण्यातील रुबी हॉल क्लिनिकमध्ये दाखल करण्याचा निर्णय घेण्यात आला आहे.
गेल्या काही दिवसांपासून शरद पवार यांची तब्येत ठीक नसल्याची चर्चा होती. मात्र आज सकाळपासूनच त्यांना अधिक त्रास जाणवू लागल्याने डॉक्टरांची एक टीम बारामतीतील गोविंदबाग या निवासस्थानी दाखल झाली. सकाळी आणि दुपारी अशा दोन वेळा डॉक्टरांनी त्यांची तपासणी केली. तपासणीनंतर खबरदारीचा उपाय म्हणून त्यांना पुण्यात नेण्याचा निर्णय घेण्यात आला.
आज बारामती तालुक्यातील काठेवाडी येथे दिवंगत नेते अजित पवार यांच्या तेराव्याचा विधी पार पडत असून, या कार्यक्रमाला शरद पवार उपस्थित राहणार होते. मात्र प्रकृती अस्वास्थ्यामुळे ते या कार्यक्रमास उपस्थित राहू शकले नाहीत.
थोड्याच वेळापूर्वी शरद पवार पुण्याच्या दिशेने रवाना झाले असून, त्यांच्या सोबत कन्या व खासदार सुप्रिया सुळे आहेत. ताफ्यात रुग्णवाहिकेचाही समावेश आहे. पुण्यात दाखल झाल्यानंतर त्यांना रुबी हॉल क्लिनिकमध्ये दाखल करून पुढील उपचार करण्यात येणार आहेत, अशी माहिती शरद पवार यांच्या कार्यालयाकडून देण्यात आली आहे.
