वायनाड : वृत्तसंस्था
मंगळवारी पहाटे वायनाड येथे भूस्खलनाची घटना घडली. सातत्याने कोसळणाऱ्या मुसळधार पावसामुळे भूस्खलन होऊन चार गावांचे अस्तित्वच पुसले गेले. साखरझोपेत असलेले गावकरी ढिगाऱ्याखाली दबल्याने या दुर्घटनेत दीडशेच्यावर नागरीक ठार, तर 128 जण जखमी झाल्याचे सरकारी अधिकाऱ्यांनी सांगितले. मुख्यमंत्री पिनराई विजयन यांनी संपूर्ण राज्यात दोन दिवस दुखवटा जाहीर केला आहे.
मुसळधार पावसामुळे वायनाड जिल्ह्यातील मेपाडीच्या डोंगराळ भागात मोठ्या प्रमाणावर भूस्खलनाची मालिका सुरू झाली. त्यानंतर अनेक गावे ढिगाऱ्याखाली गायब झाली. दुर्घटनेची माहिती मिळाल्यानंतर लष्कर, नौदल आणि राष्ट्रीय आपत्ती निवारण दलाच्या (एनडीआरएफ) बचाव पथकांनी घटनास्थळी धाव घेतली. मुसळधार पावसामुळे बचावकार्यात अडथळे येत असतानाही बचावलेल्यांचा शोध घेण्यासाठी ही पथके अथक काम करीत आहेत. राज्य सरकारने बाधित भागात पोलिस आणि अग्निशमन दलातील आपत्ती प्रतिसाद पथकेही तैनात केली आहेत. भूस्खलनामुळे प्रभावित झालेल्यांना त्वरित मदत देण्यासाठी अनेक यंत्रणा एकत्रितपणे काम करत आहेत. या नैसर्गिक संकटाने डोंगराळ जिल्ह्यातील मुंडक्काई, चूरलमला, अट्टामला आणि नूलपुझा या नयनरम्य गावांचे अस्तित्वच नष्ट केले असून, सर्वत्र केवळ विनाशाच्या खुणा दिसत आहेत. चिखल-मातीच्या ढिगाऱ्याखाली शेकडो लोक दबले गेले असण्याची शक्यता असल्याने या दुर्घटनेतील मृतांची संख्या वाढण्याची भीती आहे. बचाव पथकांना नद्या आणि चिखलामध्ये मृतदेह व मृतदेहांचे अवशेष सापडत नसल्याने मृतांची नेमकी संख्या सांगणे कठीण असल्याचे सूत्रांनी सांगितले.
मृतदेहांचे अवशेष एकाच व्यक्तीचे आहेत की, अनेकांचे हे देखील अस्पष्ट आहे. मृतांमध्ये महिला आणि मुलांची संख्या अधिक आहे. ओळख पटवण्यासाठी आणि शवविच्छेदनासाठी मृतदेह विविध रुग्णालयांतील शवागारांत नेण्यात येत आहेत. जखमींनादेखील विविध रुग्णालयांमध्ये दाखल करण्यात आले आहे. रुग्णालयांतील दृश्येही मन हेलावून टाकणारी होती. मेपाडीतील एका छोट्या, गजबजलेल्या आरोग्य केंद्राच्या मजल्यावर मृतदेह एका ओळीत ठेवण्यात आले होते. तर, अनेक जण मनावर दगड ठेवून या मृतदेहांमध्ये आपल्या प्रियजनांना शोधताना दिसत होते. काही लोक आपल्या प्रियजनांचे मृतदेह पाहून आक्रोश करीत होते. उद्ध्वस्त घरे आणि ढिगाऱ्यांखाली अडकलेल्या अनेकांनी मदतीची याचना करणारे फोन कॉल केल्याने भूस्खलनाची तीव्रता अधोरेखित झाली. वृत्तवाहिन्यांवरील दृश्ये हृदय पिळवटून टाकणारी होती. घरात किंवा वाहून गेलेल्या पुलांमुळे तसेच पूरग्रस्त रस्त्यांमुळे ठिकठिकाणी अडकून पडलेले लोक फोनवरून आक्रोश करीत सुटका करण्याची विनंती करीत होते.
केरळ सरकारने बचावकार्याला गती देण्यासाठी संरक्षण दलांची मदत मागितली आहे. 122 इन्फंट्री बटालियन मद्रासमधील 43 सदस्यीय पथक तैनात करण्यात आले आहे. त्याशिवाय संरक्षण सुरक्षा कॉर्प्स केंद्र, कन्नूर आणि कोझिकोड येथील प्रादेशिक सैन्यातील 200 सैनिक, वैद्यकीय पथके आणि उपकरणे यांचा समावेश असलेले अतिरिक्त पथकेही सेवेत आणली गेली आहेत. अडकलेल्या लोकांना त्वरीत बाहेर काढण्यासाठी सुलुर येथील हवाईतळावरून हवाई दलाची दोन हेलिकॉप्टर बाधित भागात पाठवण्यात आली आहेत. शिवाय, केरळ सरकारने केलेल्या विनंतीनुसार, एझिमाला नौदल अकादमी, कन्नूर येथील नौदलाचे नदी क्रॉसिंग पथकही बचावकार्यात सामील होण्यासाठी सज्ज झाले आहे.
पंतप्रधान नरेंद्र मोदी यांनी या घटनेबद्दल चिंता व्यक्त केली. ज्यांनी आपले प्रियजन गमावले आहेत, त्या सर्वांच्या दु:खात आपण सहभागी असल्याचे मोदी यांनी ‘एक्स’वरील पोस्टमध्ये म्हटले आहे. मुख्यमंत्री पिनराई विजयन यांच्याशी बोलून केंद्राकडून राज्याला शक्य ती सर्व मदत करण्याचे आश्वासन दिल्याचेही त्यांनी म्हटले आहे. केंद्रीय गृहमंत्री अमित शहा यांनीही मुख्यमंत्री विजयन यांना फोन करून परिस्थितीचा आढावा घेतला.
