मुंबई/कोकण वृत्तसंस्था : कोकणातून येणारे नगरपरिषद व नगरपंचायत निवडणुकांचे निकाल मुख्यमंत्री एकनाथ शिंदे यांच्या शिवसेनेसाठी अत्यंत उत्साहवर्धक ठरत आहेत. मालवण आणि कणकवलीत शिवसेनेच्या उमेदवारांनी दणदणीत विजय मिळवत आपले वर्चस्व सिद्ध केले असून, सिंधुदुर्गप्रमाणेच रत्नागिरी जिल्ह्यातही महायुतीची सरशी स्पष्टपणे दिसून येत आहे.
सिंधुदुर्ग जिल्ह्यात शिवसेनेचे प्रमुख नेते निलेश राणे यांची ताकद ठळकपणे जाणवत असताना, रत्नागिरी जिल्ह्यात मंत्री उदय सामंत आणि गृहराज्य मंत्री योगेश कदम यांनी आपले नेतृत्व पुन्हा एकदा सिद्ध केले आहे. विशेषतः खेड नगरपरिषद निवडणुकीत योगेश कदम यांच्या नेतृत्वाखाली महायुतीने 21 पैकी सर्व 21 जागा जिंकत 21-0 असा ऐतिहासिक आणि एकतर्फी विजय मिळवला आहे.
2 डिसेंबर रोजी झालेल्या मतदानानंतर खेडमध्ये कोणाची सत्ता येणार, याकडे सर्वांचे लक्ष लागले होते. मात्र निकाल जाहीर होताच महायुतीने क्लीन स्वीप करत विरोधकांना नामोहरम केले. या निवडणुकीत महाविकास आघाडीला खातेही उघडता आले नाही, हे विशेष ठरले.
या घवघवीत विजयानंतर माधवी भुटाला या खेड नगरपरिषदेच्या नगराध्यक्षा म्हणून विराजमान होणार आहेत. जनतेने दिलेल्या स्पष्ट कौलातून विकासाभिमुख आणि स्थिर नेतृत्वावरचा विश्वास अधोरेखित झाल्याचे चित्र आहे. या निवडणुकीत शिवसेनेचे 17 उमेदवार, तर भाजपचे 3 उमेदवार विजयी झाले आहेत.
योगेश कदम हे शिवसेनेचे ज्येष्ठ नेते रामदास कदम यांचे पुत्र असून, रामदास कदम यांनी अलीकडे उद्धव ठाकरे यांच्यावर केलेल्या गंभीर आरोपांनंतर कोकणातील राजकारण अधिकच तापले होते. अशा पार्श्वभूमीवर मिळालेला हा निकाल शिंदे गटाच्या शिवसेनेसाठी मोठे बळ देणारा मानला जात आहे.
एकूणच, खेडमधील 21-0 असा निकाल हा कोकणातील राजकारणात मैलाचा दगड ठरणारा असून, महायुतीच्या एकसंध नेतृत्वावर जनतेचा ठाम विश्वास असल्याचे स्पष्ट संकेत देणारा ठरला आहे.
