नवी दिल्ली वृत्तसंस्था
बांगलादेशातील राजकीय वातावरण पुन्हा एकदा तापले असून शेख हसीना विरोधी नेत्यांवरील हल्ल्यांची मालिका थांबण्याचे नाव घेत नाही. खुलना येथे सोमवारी दुपारी नॅशनल सिटिजन्स पार्टी (NCP) चे नेते मोहम्मद मोतालेब शिकदर यांच्यावर अज्ञात हल्लेखोरांनी घरात घुसून गोळीबार केल्याची धक्कादायक घटना घडली. या हल्ल्यामुळे संपूर्ण परिसरात भीतीचे वातावरण पसरले आहे.
बांगलादेशी माध्यमांनी दिलेल्या माहितीनुसार, दुपारी सुमारे १२ वाजता हल्लेखोरांनी थेट मोतालेब शिकदर यांच्या डोक्याला लक्ष्य करत गोळी झाडली. गोळी लागल्यानंतर ते गंभीर जखमी होऊन खाली कोसळले. घटनास्थळी उपस्थित नागरिकांनी तातडीने त्यांना खुलना मेडिकल कॉलेज रुग्णालयात दाखल केले. सुरुवातीला त्यांची प्रकृती चिंताजनक होती, मात्र डॉक्टरांच्या प्रयत्नांमुळे आता ते धोक्याबाहेर असल्याची माहिती देण्यात आली आहे.
पोलीस अधिकारी अनिमेष मंडल यांनी सांगितले की, गोळी एका कानाजवळून शरीरात शिरली आणि दुसऱ्या बाजूने बाहेर पडली. सुदैवाने गोळी मेंदूपर्यंत पोहोचली नाही, त्यामुळे मोठा अनर्थ टळला. या घटनेनंतर पोलिसांनी परिसरात बंदोबस्त वाढवला असून हल्लेखोरांचा शोध घेण्यासाठी व्यापक तपास मोहीम सुरू केली आहे.
मोहम्मद मोतालेब शिकदर हे NCP चे खुलना विभागाचे प्रमुख असून पक्षाशी संलग्न असलेल्या ‘NCP श्रमिक शक्ती’ या कामगार संघटनेचेही ते आयोजक आहेत. NCP हा त्या विद्यार्थी चळवळीतून उभा राहिलेला पक्ष आहे, ज्याने मोठ्या आंदोलनातून शेख हसीना यांचे सरकार उलथवून टाकण्यात महत्त्वाची भूमिका बजावली होती.
दरम्यान, खुलना येथे आयोजित करण्यात येणाऱ्या कामगार रॅलीच्या तयारीत असतानाच हा हल्ला झाल्याचे सांगण्यात येत आहे. या हल्ल्यामागील नेमका उद्देश आणि सूत्रधार कोण, याचा शोध घेण्यासाठी पोलीस विविध दिशांनी तपास करत आहेत. शेख हसीना सरकारच्या पतनानंतरही देशात सुरू असलेल्या राजकीय हिंसाचारामुळे बांगलादेश पुन्हा अस्थिरतेच्या दिशेने जात असल्याची भीती व्यक्त केली जात आहे.
