नागनहळळी आश्रमशाळेच्या प्रयोगाची राष्ट्रीयस्तरावर निवड

अक्कलकोट : तालुका प्रतिनिधी

राज्य विज्ञान संस्था, नागपूर व श्री शिवाजी शिक्षण संस्था, अमरावती यांच्या संयुक्त विद्यमाने आयोजित ५३ वे राज्यस्तरीय बालवैज्ञानिक प्रदर्शन २०२५–२६ दि. २८ जानेवारी ते १ फेब्रुवारी या कालावधीत नागपूर येथे पार पडले.यामध्ये के. एस. एम. कनिष्ठ महाविद्यालय, नागनळळी येथील विद्यार्थी फडतरे ओंकार व महेश टेंगळे यांनी स्मार्ट ॲग्रीकल्चर, कॅटल फार्म व बहुउपयोगी शेतीयंत्र हा अभिनव वैज्ञानिक प्रकल्प सादर केला. या प्रकल्पास माध्यमिक गटातून राज्यात द्वितीय क्रमांक मिळून राष्ट्रीय विज्ञान प्रदर्शनासाठी निवड झाली आहे.

या प्रदर्शनात महाराष्ट्र राज्यातून माध्यमिक गटातील १११ वैज्ञानिक उपकरणांची मांडणी करण्यात आली होती.यावेळी डॉ.पंकज भोयर, डॉ. महेंद्र ढोरे,केशवराव मेतकर, डॉ. मिलिंद बाराहते, डॉ. राजकुमार अवसरे आदी मान्यवरांच्या हस्ते सन्मानचिन्ह व प्रमाणपत्र देऊन गौरवण्यात आले.या प्रकल्पामुळे शेती व्यवस्थापन अधिक सुलभ, आधुनिक व कार्यक्षम होते. ESP32 + M तंत्रज्ञानाच्या साहाय्याने हवामान निरीक्षण,
पाणीपुरवठा व सिंचन प्रणालीवर अचूक नियंत्रण ठेवता येते, त्यामुळे पाण्याची बचत होते.पशुपालनासाठी लागणारा वेळ, श्रम व खर्च कमी होतो. गोठ्यातील पाळीव प्राण्यांच्या देखभालीसाठी स्वयंचलित प्रणाली उपलब्ध असून संपूर्ण यंत्रणा सौरऊर्जेवर आधारित असल्याने वीज खर्चात बचत होते व पर्यावरणपूरक शेतीला चालना मिळते.

बहुउपयोगी शेतीयंत्राच्या मदतीने औषध फवारणी, तण नियंत्रण व पेरणी करता येते, त्यामुळे मजुरीचा खर्च कमी होतो. हे सर्व कार्य मोबाईलद्वारे नियंत्रित करता येते. या विद्यार्थ्यांना प्रशालेतील शिक्षक प्रा. विज्ञान रवींद्र नवले, अमोल पाटील, शंभुलिंग बशेट्टी, वसीम शेख, शुभांगी मिठारे व प्रयोगशाळा सहाय्यक शेख नूरुद्दीन यांनी मार्गदर्शन केले. या यशाबद्दल संस्थेचे सचिव जावेद पटेल, प्राचार्य आय. एम.मुजावर, मुख्याध्यापक आर. जी. शेख व प्रशालेतील शिक्षकांनी सर्व यशस्वी विद्यार्थी व मार्गदर्शक शिक्षकांचे अभिनंदन करून पुढील वाटचालीस शुभेच्छा दिल्या.