मुंबई : वृत्तसंस्था
राज्यातील महायुती सरकारमधील अजित पवार यांच्या राष्ट्रवादी काँग्रेस पक्षाचे (NCP) माजी आमदार झीशान सिद्दिकी यांना जीवे मारण्याची धमकी मिळाली. धमकीत 10 कोटी रुपयांची मागणी करण्यात आली आहे. हा धमकीचा संदेश एका अज्ञात मेल आयडीवरून पाठवण्यात आल्याचे सांगण्यात येत आहे.
यामध्ये झीशान यांना धमकी देण्यात आली की जर पैसे दिले नाहीत तर गंभीर परिणामांना सामोरे जावे लागेल. झीशान सिद्दिकी यांनी तात्काळ मुंबई पोलिसांना या मेल बाबत कळवले आहे. त्यानंतर वांद्रे पोलिस ठाण्याचे एक पथक त्यांचा जबाब नोंदवण्यासाठी त्याच्या घरी पोहोचले. 12 ऑक्टोबर 2024 रोजी झीशान यांचे वडील आणि राष्ट्रवादी काँग्रेसचे ज्येष्ठ नेते बाबा सिद्दिकी यांची गोळ्या घालून हत्या करण्यात आली होती. या हाय-प्रोफाइल हत्येची जबाबदारी नंतर लॉरेन्स बिश्नोई टोळीने घेतली.
12 ऑक्टोबर 2024 रोजी रात्री 9:30 वाजता, महाराष्ट्र सरकारचे माजी मंत्री बाबा सिद्दिकी यांची मुंबईतील वांद्रे येथील खेरवाडी सिग्नलवर हत्या करण्यात आली. बाबा सिद्दिकी त्यांचा मुलगा झीशानच्या ऑफिसमधून बाहेर पडले होते तेव्हा त्यांच्यावर सहा गोळ्या झाडण्यात आल्या.सिद्दिकी यांच्या पोटात दोन गोळ्या आणि छातीत एक गोळी लागली. त्यांना लीलावती रुग्णालयात दाखल करण्यात आले, जिथे रात्री 11.27 वाजता त्यांना मृत घोषित करण्यात आले. या प्रकरणात पोलिसांनी उत्तर प्रदेशातील बहराइच येथील रहिवासी हरीश कुमार, कैथल (हरियाणा) येथील गुरमेल बलजीत सिंग, बहराइच (उत्तर प्रदेश) येथील धर्मराज कश्यप आणि पुणे (महाराष्ट्र) येथील प्रवीण लोणकर यांना अटक केली. लॉरेन्स गँगने हत्येची जबाबदारी घेतली होती. बाबा सिद्दीकी हे रिअल इस्टेट व्यवसायातही गुंतलेले होते. तथापि, ते राजकारण आणि व्यवसायापेक्षा त्याच्या बॉलिवूड कनेक्शनसाठी अधिक प्रसिद्ध होते.
