पुणे : वृत्तसंस्था
राज्यातील पुणे शहराच्या पूर्व भागातील नवनियुक्त समाविष्ट गावांमध्ये मूलभूत सुविधांचा प्रश्न गंभीर बनला आहे. विशेषतः विश्रांतवाडी, कळस आणि धानोरी या भागांमध्ये रस्ते आणि पाण्याची समस्या वर्षानुवर्षे भेडसावत आहे. गेल्या तीन वर्षांपासून नगरसेवक नसल्यामुळे या भागाच्या विकासाकडे प्रशासनाचे जाणीवपूर्वक दुर्लक्ष होत असल्याचा नागरिकांचा आरोप आहे. याच नागरी समस्यांवर प्रशासनाचे लक्ष वेधण्यासाठी आज (दिनांक) महापालिका आयुक्त तथा प्रशासक नवल किशोर राम यांच्या गाडीसमोर आडवे झोपून अनोखे आंदोलन करण्यात आले.
नेमके काय घडले?
कळस, धानोरी, लोहगाव येथील नागरी प्रश्नांबाबत वारंवार निवेदन देऊनही प्रश्न सुटत नसल्यामुळे, सामाजिक कार्यकर्ते पूजा जाधव आणि धनंजय जाधव यांनी पुणे मनपा आयुक्त नवल किशोर राम यांच्या गाडीसमोर लोटांगण घालून आंदोलन केले. आयुक्तांच्या गाडीसमोर धानोरीमध्ये हे आंदोलन सुरू असताना, आयुक्तांनी संतप्त होऊन, “बाकी ठिकाणी प्रश्न नाहीत का? वाघोलीत प्रश्न नाहीत का? नाटक करू नका…” अशा शब्दांत कार्यकर्त्यांना फटकारले.
यावर धनंजय जाधव यांनी आयुक्तांना प्रत्युत्तर देत, “तुम्ही जनतेचे सेवक आहात, भाषा नीट वापरा,” असे सुनावले. या दरम्यान जाधव आणि आयुक्त यांच्यात चांगलीच खडाजंगी उडाली. आयुक्तांकडून योग्य प्रतिसाद न मिळाल्याने, “कळस, धानोरी, लोहगाव मधील प्रश्नांकडे पालिकेचे जाणीवपूर्वक दुर्लक्ष असून, चार महिने पाठपुरावा करूनही पालिकेकडून काहीच कारवाई होत नाही,” अशी प्रतिक्रिया धनंजय जाधव यांनी यानंतर दिली.
