मुंबई : वृत्तसंस्था
प्रसिद्ध गझल गायक पंकज उधास यांचे आज वयाच्या 72 व्या वर्षी निधन झाले. गायक गेल्या अनेक दिवसांपासून आजारी होते. त्यांची मुलगी नायब हिने ही माहिती दिली आहे. पंकज उधास यांना प्रसिद्ध गझल चिठ्ठी आयी है मधून ओळख मिळाली होती. पंकज उधास यांचा जन्म 17 मे 1951 रोजी गुजरातमधील जेतपूर येथे झाला. तीन भावांमध्ये ते सर्वात लहान होते. त्यांचे कुटुंब राजकोटजवळील चरखाडी नावाच्या गावातील एका कसब्यात राहत होते. त्यांचे आजोबा जमीनदार आणि भावनगर संस्थानाचे दिवाणही होते. त्यांचे वडील केशुभाई उधास हे सरकारी कर्मचारी होते, त्यांना इसराज वाजवण्याची खूप आवड होती. त्यांची आई जितुबेन उधास यांना गाण्याची खूप आवड होती. यामुळेच पंकज उधास आणि त्यांच्या दोन्ही भावांचा संगीताकडे नेहमीच कल होता.
पंकज यांनी कधीच विचार केला नव्हता की ते गाण्यातून आपलं करियर करतील. त्या काळात भारत आणि चीनमध्ये युद्ध सुरू होते. यावेळी लता मंगेशकर यांचे ‘ऐ मेरे वतन के लोगों’ हे गाणे रिलीज झाले. पंकज यांना हे गाणं खूप आवडलं. त्यांनी हे गाणे कोणाच्याही मदतीशिवाय त्याच ताल आणि सुरात रचले.
एके दिवशी शाळेच्या मुख्याध्यापकांना कळाले की ते गाण्यात चांगले आहेत, त्यानंतर त्यांना शाळेच्या प्रार्थना संघाचे प्रमुख बनवण्यात आले. एकदा माता राणीची चौकी त्यांच्या कॉलनीत बसली होती. रात्री आरती-भजनानंतर तिथे सांस्कृतिक कार्यक्रम व्हायचा. या दिवशी पंकज यांच्या शाळेतील शिक्षकांनी येऊन त्यांना सांस्कृतिक कार्यक्रमात गाण्याची विनंती केली. पंकज यांनी ए मेरे वतन के लोगों हे गाणे गायले. त्यांच्या गाण्याने तिथे बसलेल्या प्रत्येकाच्या डोळ्यात पाणी आले. त्यांनाही भरभरून दाद मिळाली. श्रोत्यांमधून एक माणूस उभा राहिला आणि त्यांच्यासाठी टाळ्या वाजवून त्यांना 51 रुपये बक्षीस म्हणून दिले.
