मुंबई वृत्तसंस्था : जानेवारी २०२६च्या सुरुवातीलाच सोने आणि चांदीच्या दरांनी उच्चांक गाठत बाजारात खळबळ उडवली आहे. अवघ्या पहिल्या दोन आठवड्यांतच या मौल्यवान धातूंनी नवे रेकॉर्ड प्रस्थापित केले असून गुंतवणूकदारांचे लक्ष पुन्हा सुरक्षित गुंतवणुकीकडे वळले आहे. मल्टी कमोडिटी एक्सचेंज (MCX) वर सोन्याचा दर तब्बल सुमारे १.४० लाख रुपये प्रति १० ग्रॅमच्या आसपास पोहोचला असून चांदीने २.६० लाख रुपये प्रति किलोचा टप्पा पार केला आहे.
तज्ज्ञांच्या मते, या दरवाढीमागे जागतिक पातळीवरील वाढता तणाव हे प्रमुख कारण आहे. अमेरिका, इराण, व्हेनेझुएला, चीन आणि जपानशी संबंधित घडामोडींमुळे जागतिक बाजारात भीती आणि अनिश्चिततेचे वातावरण निर्माण झाले आहे. अशा काळात गुंतवणूकदार शेअर बाजार आणि जोखमीच्या गुंतवणुकीतून पैसे काढून सोने-चांदीसारख्या सुरक्षित पर्यायांकडे वळतात, त्यामुळेच दरांमध्ये झपाट्याने वाढ होत असल्याचे विश्लेषक सांगतात.
याशिवाय अमेरिकेचे माजी राष्ट्राध्यक्ष डोनाल्ड ट्रम्प यांनी इराणसोबत व्यापार करणाऱ्या देशांवर प्रचंड टॅरिफ लावण्याची दिलेली धमकी, तसेच अमेरिकेच्या फेडरल रिझर्व्ह बँकेच्या स्वातंत्र्याबाबत उपस्थित झालेले प्रश्न यामुळेही बाजारातील अस्वस्थता वाढली आहे. या पार्श्वभूमीवर सुरक्षित गुंतवणुकीला अधिक मागणी वाढताना दिसत आहे.
मोतीलाल ओसवाल या नामांकित ब्रोकरेज हाऊसच्या अहवालानुसार २०२६ हे वर्ष सोन्यासाठी अस्थिरता आणि चढ-उतारांनी भरलेले असणार आहे. मात्र, अशा परिस्थितीत सोने आणि चांदी गुंतवणूकदारांसाठी मजबूत आधार ठरू शकतात. सेंट्रल बँकांकडून सातत्याने सोन्याची खरेदी सुरू असून खाणींतून होणारा पुरवठा मर्यादित आहे. त्याचबरोबर जुन्या सोन्याची विक्रीही फारशी वाढलेली नाही. या सर्व घटकांमुळे येत्या काळातही सोने-चांदी गुंतवणूक पोर्टफोलिओसाठी महत्त्वाचा आधार ठरण्याची शक्यता तज्ज्ञांनी व्यक्त केली आहे.
