छत्रपती संभाजीनगर : वृत्तसंस्था
जगप्रसिद्ध वेरूळ लेणी परिसरातील बारावे ज्योतिर्लिंग असलेले श्री घृष्णेश्वर महादेव मंदिर मंगळवारी (३ मार्च) खग्रास चंद्रग्रहणाच्या पार्श्वभूमीवर दुपारी ३ ते सायंकाळी ७ या वेळेत दर्शनासाठी बंद राहणार आहे. ग्रहणकाळात मंदिराचे दरवाजे बंद ठेवण्याची परंपरा असल्याने मंदिर प्रशासनाने सुधारित दर्शन वेळापत्रक जाहीर केले आहे.
३ मार्च रोजी होळी (धूलिवंदन) सण असल्याने भाविकांची मोठी गर्दी होण्याची शक्यता आहे. मात्र दुपारी ३:०० ते सायंकाळी ७:०० या वेळेत भाविकांना गाभाऱ्यात प्रवेश किंवा दर्शन घेता येणार नाही. लांबून येणाऱ्या भाविकांनी व पर्यटकांनी या वेळेची नोंद घेऊन आपले नियोजन करावे, असे आवाहन मंदिर ट्रस्टचे अध्यक्ष कुणाल दांडगे व देवस्थान ट्रस्टतर्फे करण्यात आले आहे. योगायोगाने मंगळवारी वेरूळ लेणीचा साप्ताहिक देखभाल दिवस असल्याने लेणी पर्यटकांसाठी बंद असतात. त्यामुळे त्या दिवशी दुपारी मंदिरही बंद राहणार असल्याने बाहेरगावांहून येणाऱ्या पर्यटकांना लेणी व मंदिर या दोन्ही ठिकाणच्या दर्शनापासून काही काळ मुकावे लागणार आहे. प्रशासनाने होणाऱ्या गैरसोयीबद्दल दिलगिरी व्यक्त केली आहे.
दर्शनाचे सुधारित वेळापत्रक
-
दर्शन बंद होण्याची वेळ: दुपारी ३:०० वाजेपासून
-
चंद्रग्रहण कालावधी: दुपारी ३:२० ते सायंकाळी ६:४७
-
शुद्धीकरण व महापूजा: सायंकाळी ६:४७ ते ७:०० — मंदिराची स्वच्छता व विशेष शुद्धीकरण पूजा
-
दर्शन पुन्हा सुरू: सायंकाळी ७:०० वाजेनंतर मंदिर भाविकांसाठी खुले
ग्रहणानंतर शुद्धीकरण विधी पूर्ण झाल्यावर नियमित पूजा व दर्शन सुरू होईल, असे ट्रस्टकडून स्पष्ट करण्यात आले आहे. भाविकांनी गर्दी टाळण्यासाठी सकाळच्या वेळेत दर्शन घेण्याचा पर्याय निवडावा, असेही आवाहन करण्यात आले आहे.
