यवतमाळ : वृत्तसंस्था
महामार्गावर वेग आणि ओव्हरटेकच्या नादात होणाऱ्या मृत्यूंचा प्रश्न पुन्हा तीव्र झाला आहे. यवतमाळ जिल्ह्यात आता हृदयद्रावक घड्त्ना घडली आहे. मारेगाव तालुक्यातील जळका फाट्याजवळ चंद्रपूर–यवतमाळ महामार्गावर रात्री आठच्या सुमारास एसटी बस आणि ट्रक यांच्यात समोरासमोर धडक झाली. वणीवरून करंजीकडे निघालेली एसटी बस प्रवाशांनी भरलेली असताना, करंजीकडून येणाऱ्या ट्रकचालकाने वेगात कारला ओव्हरटेक करण्याचा प्रयत्न केला. ओव्हरटेक करतानाच ट्रक भरधावपणे बसवर आदळला.
धडकेची तीव्रता इतकी भयानक होती की, एसटी बसची ड्रायव्हर साइड अक्षरशः दाबली गेली आणि वाहन दोन तुकड्यांत विभक्त झालं. बसचे लोखंडी सांगाडे तुटून रस्त्यावर विखुरले होते आणि आसपास क्षणात भीषण किंकाळ्यांचा आवाज घुमू लागला. या अपघातात तात्काळ तीन प्रवाशांचा मृत्यू झाला. तसेच अंदाजे 14 जण गंभीर जखमी झाले असून, काहींची प्रकृती चिंताजनक आहे.
या भीषण दुर्घटनेची माहिती स्थानिकांना मिळताच लोक धावून आले. अनेक प्रवासी वाहनातच अडकून राहिल्याने ग्रामस्थांनी त्यांच्या जीवाची पर्वा न करता मदतीचा हात पुढे केला. मारेगाव पोलिस पथक आणि रुग्णवाहिका तात्काळ घटनास्थळी दाखल झाले. पोलिस, आरोग्य कर्मचारी आणि गावकऱ्यांच्या मदतीने सर्व जखमींना बाहेर काढण्यात आले. तत्काळ यवतमाळ, पांढरकवडा, मारेगाव आणि करंजी येथील सरकारी रुग्णालयांत त्यांच्यावर उपचार सुरु करण्यात आले. दुर्घटनेनंतर ट्रकचालकाला पोलिसांनी ताब्यात घेऊन तपासाची दिशा वेगाने वाढवली आहे. ओव्हरटेकच्या चुकीमुळे पुन्हा एकदा निरपराध जीवांचा बळी गेला, याची संतापजनक जाणीव सर्वांनाच होत आहे.
या घटनेने राज्य शासन, वाहतूक विभाग आणि पोलिस प्रशासनासमोर महत्त्वाचा सवाल उभा राहिला आहे. वेगावर नियंत्रण आणि ओव्हरटेकिंगसाठी कडक नियम कितपत पाळले जातात? यवतमाळ घटनेनंतर लगेचच लातूरमध्ये मोठा अपघात झाला ज्यात आणखी दोन लोक मृत्युमुखी पडले. रत्नागिरीत बस दरीत कोसळत असताना चालकाच्या दक्षतेमुळे सर्व प्रवासी सुखरूप राहिले, परंतु सतत होत असलेल्या या दुर्घटना हे स्पष्ट संकेत देतात की राज्यात त्वरित सुरक्षा उपायांची अंमलबजावणी करण्याची गरज आहे.
