नवी दिल्ली : वृत्तसंस्था
आपल्या कॉमेडियन स्वभावामुळे जगभर प्रसिद्ध असलेल्या कपिल शर्मा बाबत एक मोठी बातमी समोर आली आहे. कॉमेडियन कपिल शर्माला पाकिस्तानातून ई-मेलद्वारे जीवे मारण्याच्या धमक्या आल्या आहेत. कपिलशिवाय अभिनेता राजपाल यादव, कोरिओग्राफर रेमो डिसूझा आणि कॉमेडियन सुगंधा मिश्रा यांनाही जीवे मारण्याची धमकी आली आहे.
ई-मेलमध्ये लिहिले आहे – आम्ही तुमच्या हालचालींवर लक्ष ठेवून आहोत. आम्ही एक संवेदनशील बाब तुमच्या निदर्शनास आणून दिली आहे. हा सार्वजनिक स्टंट किंवा तुम्हाला त्रास देण्याचा प्रयत्न नाही. आम्ही तुम्हाला हे गांभीर्याने घेण्याची आणि गोपनीयता राखण्याची विनंती करतो.
पाकिस्तानच्या ई-मेलच्या शेवटी लिहिले आहे- जर हे केले नाही तर त्याचा तुमच्या व्यावसायिक आणि वैयक्तिक आयुष्यावर परिणाम होऊ शकतो. आम्ही या ईमेलला पुढील 8 तासांत प्रतिसाद देऊ इच्छितो. जर तुम्ही हे केले नाही तर आम्ही असे मानू की तुम्ही ते गांभीर्याने घेतले नाही. आम्ही तुमच्यावर कारवाई करू. आम्ही बिश्नोई नाही. याप्रकरणी कपिलने तक्रार दाखल केली आहे. त्याच्या आधी रेमो डिसूझा आणि सुगंधा मिश्रा यांनी मेल आल्यानंतर तक्रार दाखल केली होती. राजपाल यादवला गेल्या वर्षी 14 डिसेंबरला हा मेल आला होता. त्याने 17 डिसेंबर रोजी पोलिसांत तक्रार दाखल केली होती. हा मेल राजपाल यादवच्या मेलच्या स्पॅम बॉक्समध्ये पडला होता. या प्रकरणाचा तपास सुरू असल्याचे पोलिसांनी सांगितले आहे.
