सोलापूर,दि.५ : महाराष्ट्र खो-खो असोसिएशनतर्फे माजी अध्यक्ष व खो-खो संघटनेचे आधारस्तंभ खासदार शरदचंद्र पवार यांच्या वाढदिवसानिमित्त ७ नोव्हेंबरपासून शनिवारी आणि रविवारी सलग तीन आठवडे खो-खो खेळाडू आणि प्रशिक्षक यांच्यासाठी ऑनलाईन कार्यशाळेचे आयोजन केले आहे.
या कार्यशाळेत फिझिओथेरपिस्ट डॉ. कश्मीरा सबनीस या शारिरीक तंदुरुस्ती व खेळाडूंची ताकद वाढविण्याकरिता प्रात्यक्षिकासह मार्गदर्शन करणार आहेत.
कोरोनकालावधीत टाळेबंदी लागू केल्यानंतर स्पर्धा, सराव थांबला होता; परंतु महाराष्ट्र राज्य खो-खो असोसिएशन प्रत्यक्ष सराव थांबला असला तरीही घरामध्ये राहून सराव कसा करता येईल यासह फिटनेससाठी ऑनलाईन कार्यशाळांचे आयोजन सातत्याने सुरुच ठेवले. खो-खोचे प्रशिक्षक, पंच यांच्यासाठी ऑनलाईन मार्गदर्शनाचा फंडा सुरु ठेवत सर्वांपुढे आदर्श ठेवला आहे.
कोरोनातील टाळेबंदी शिथिल झाल्यानंतर मैदानावरील सरावाला गती मिळत आहे. खेळाडूंना ताकद वाढवणे आणि शारिरीक तंदुरुस्ती राखणे या दोन्ही गोष्टी महत्त्वाच्या आहेत.
शनिवारी ७ नोव्हेंबरपासून दुपारी ४ ते ६ आणि रविवारी सकाळी११ ते दुपारी १ वाजेपर्यंत प्रात्यक्षिकासह मार्गदर्शन करतील. कार्यशाळेच्या पहिल्या दिवशी खो-खोसाठीचे व्यायामप्रकार याची माहिती दिली जाईल. ८ नोव्हेंबरच्या सत्रात खेळाडूंमधील लवचिकता वाढवण्यासाठी आवश्यक एक्स्झरसाईज, १४ नोव्हेंबरला खो-खोसाठी पुरक मसल्स आणि स्ट्रेंथ संदर्भातील मार्गदर्शन, १५ नोव्हेंबरला खेळाडूतील क्षमता वाढवणे, वेग यासाठी पूरक सराव याविषयक तर२१ नोव्हेंबरला दुखापतीमधुन बरे होण्यासाठीचे नियोजनबध्द तंत्र यावर मार्गदर्शन करण्यात येणार आहे. हे ऑनलाईन चर्चा सत्र व सादरीकरण झुम अॅपद्वारे होणार आहे.
या कार्यक्रमाचे समन्वयक राजेंद्र साप्ते आहेत. राज्यातील सर्व खो-खो प्रशिक्षक आणि खेळाडू यांनी लाभ घ्यावा असे आवाहन राज्य संघटनेचे अध्यक्ष संजीवराजे नाईक निंबाळकर, खो-खो महासंघाचे सहसचिव डॉ. चंद्रजीत जाधव, राज्य संघटनेचे सचिव अॅड. गोविंद शर्मा यांनी केले आहे.
———-
