अक्कलकोट शहरात हत्तीरोग व मतदार जनजागृती रॅलीला प्रतिसाद

अक्कलकोट : तालुका प्रतिनिधी

हत्तीरोग नियंत्रण पथक व आरोग्य विभाग पंचायत समिती अक्कलकोट यांच्या संयुक्त विद्यमाने गुरुवारी अक्कलकोट शहरामध्ये हिवताप व हत्तीरोग जनजागृती व मतदार जनजागृतीसाठी विद्यार्थी रॅली काढण्यात आली. या उपक्रमाला नागरिकांचा उत्स्फूर्त असा प्रतिसाद मिळाला.जागतिक हिवताप दिनाच्या अनुषंगाने मुख्य कार्यकारी अधिकारी यांच्या सूचनेनुसार व जिल्हा आरोग्य अधिकारी सोलापूर यांच्या मार्गदर्शनाखाली सोलापूर जिल्ह्यामध्ये विविध कार्यक्रमाचे आयोजन करण्यात आले आहे.त्या उपक्रमाचा एक भाग होता.

अक्कलकोट शहरातून पंचायत समिती, हनुर चौक, कारंजा चौक,फत्तेसिंह चौक, ए-वन चौक ,विजय कामगार चौक येथून रॅलीचे आयोजन करण्यात आले होते.या रॅलीसाठी कल्याणशेट्टी शाळेतील विदयार्थी व खेडगी शाळेचे विद्यार्थी व एनसीसी ग्रुप उपस्थित होते. या रॅलीसाठी गटविकास अधिकारी शंकर कवितके, तालुका आरोग्य अधिकारी डॉ.अश्विन करजखेडे ,हत्तीरोग अधिकारी के. एस. मंजुळ यांच्या उपस्थितीत अक्कलकोट शहरात पंचायत समिती येथून हिवताप जनजागृती व मतदार जनजागृती रॅली संपन्न झाली. यासाठी गटशिक्षणाधिकारी प्रशांत अरबाळे यांचे सहकार्य लाभले.सदर रॅलीसाठी सुरेखा कल्याणशेट्टी माध्यमिक व उच्च माध्यमिक विद्यालय तसेच खेडगी प्रशाला अक्कलकोटमधील एनसीसी ग्रुप व शाळेतील विद्यार्थ्यांनी सहभाग नोंदवला.सर्व अधिकारी व कर्मचारी यांनी रॅली यशस्वी करण्यासाठी परिश्रम घेतले.यावेळी नागरिकांना आरोग्य शिक्षण,म्हणी आणि स्लोगन तसेच पोस्टर बॅनर याद्वारे आरोग्य शिक्षण व मतदार जनजागृती करण्यात आली.