पुणे : वृत्तसंस्था
राज्यातील ज्येष्ठ समाजसेवक आणि कामगार चळवळीचे प्रतीक मानले जाणारे डॉ. बाबा आढाव यांची प्रकृती बिघडल्याने त्यांना पुण्यातील पुना हॉस्पिटलमध्ये दाखल करण्यात आले आहे. गेल्या दहा दिवसांपासून ते तज्ज्ञ डॉक्टरांच्या देखरेखीखाली उपचार घेत आहेत. सध्या त्यांना आयसीयूमध्ये ठेवण्यात आले असून त्यांच्या प्रकृतीत मधूनमधून चढ-उतार होत असल्याची माहिती रुग्णालयातील सूत्रांनी दिली. यामुळे सामाजिक क्षेत्रात आणि त्यांच्या कार्यकर्त्यांमध्ये मोठी चिंता पसरली आहे.
डॉ. आढाव यांच्या प्रकृतीची माहिती मिळाल्यानंतर राष्ट्रवादी काँग्रेसचे अध्यक्ष शरद पवार स्वतः रुग्णालयात भेट देण्यासाठी पोहोचले. त्यांनी वैद्यकीय पथकाकडून संपूर्ण माहिती जाणून घेतली तसेच कुटुंबीयांशी संवाद साधून धीर दिला. उपचाराची प्रगती, पुढील आवश्यक पावले आणि आरोग्यस्थितीबाबत पवारांनी डॉक्टरांशी सविस्तर चर्चा केली. गरज भासल्यास सर्वतोपरी मदत करण्याचे आश्वासनही त्यांनी परिवाराला दिले.
डॉक्टरांकडून मिळालेल्या माहितीनुसार, डॉ. आढाव यांना हृदयाशी संबंधित समस्या जाणवत असल्याने त्यांना तत्काळ रुग्णालयात दाखल करण्यात आले. हृदयरोगतज्ज्ञ डॉ. अभिजित वैद्य आणि त्यांच्या टीमकडून आवश्यक उपचार करण्यात येत आहेत. नातेवाईकांनी सांगितले की, प्रकृती गंभीर असली तरी सध्या ती स्थिर आहे. अचानक तब्येत बिघडल्याने त्यांना अधिक काळासाठी आयसीयूमध्ये बारकाईने निरीक्षणाखाली ठेवण्यात आले आहे.
दरम्यान, बाबा आढाव यांच्या कुटुंबीयांनी जनतेला एक महत्त्वाची विनंती केली आहे. त्यांनी आवाहन केले की, कोणत्याही प्रकारच्या अफवा किंवा अप्रमाणित माहिती पसरवू नये. चुकीच्या बातम्यांमुळे गैरसमज निर्माण होऊ शकतात, त्यामुळे फक्त कुटुंबीयांकडून किंवा अधिकृत सूत्रांकडून मिळणाऱ्या माहितीवरच विश्वास ठेवावा. तसेच आढाव यांच्या प्रकृतीविषयीच्या पुढील घडामोडी वेळोवेळी जनतेपर्यंत पोहोचवल्या जातील, असेही त्यांनी स्पष्ट केले.
राज्यातील कामगार, शेतकरी, दुर्बल घटकांसाठी आयुष्यभर झटलेल्या या समाजसेवकांच्या प्रकृतीविषयी चिंतेचे वातावरण असून त्यांचे समर्थक, सामाजिक संघटनांचे कार्यकर्ते आणि सर्वसामान्य जनतेकडून त्यांच्या लवकर बरे होण्यासाठी प्रार्थना केली जात आहे.
