अक्कलकोट, दि. २९ : सर्वसामान्य जनतेची कामे स्थानिक पातळीवर व्हावीत तसेच जनतेला विविध योजनांचे लाभ लवकर मिळावेत, यासाठी राज्य शासनामार्फत शासन आपल्या दारी हा उपक्रम राबविला जात आहे. त्या अनुषंगाने तहसिल कार्यालय अक्कलकोट व दुधनी नगरपरिषद यांच्या संयुक्त विद्यमाने दुधनी नगरपरिषद सभागृह येथे दुधनी येथे हा उपक्रम आयोजित करण्यात आल्याची माहिती मुख्याधिकारी अतिश वाळुंज यांनी दिली. शहरातील व परिसरातील नागरिकांपर्यंत शासनाच्या विविध योजना पोहोचण्यास व कमीत कमी कागदपत्रे,जलद मंजूरी व शासकीय निर्धारित शुल्कात नागरिकांना शासकीय योजनांचा लाभ मिळवून देण्याकरिता दि.३१ मे रोजी सकाळी ११ ते दुपारी ५ वाजेपर्यंत शिबीराचे आयोजन केले आहे. तरी नागरिकांनी या शिबिरात येऊन लाभ घ्यावा, असे आवाहन मुख्याधिकारी वाळुंज यांनी केले आहे.
