मोठी बातमी : “एकनाथ शिंदे दिल्लीत: ठाकरे गटाचे खासदार ‘शिवशक्ती’त खेचण्याचा रण!”

नवी दिल्ली : वृत्तसंस्था

राज्याच्या राजकारणात पुन्हा एकदा मोठ्या उलथापालथीचे संकेत दिसून येत आहेत. मुख्यमंत्री एकनाथ शिंदे सध्या दिल्ली दौऱ्यावर असून, त्यांच्या या भेटीमागे उबाठा गटाचे खासदार आपल्या पक्षात घेण्यासाठी प्रयत्न सुरू असल्याचे चर्चेत आहे. सूत्रांकडून मिळालेल्या माहितीनुसार, ठाकरे गटातील जवळपास निम्माहून अधिक खासदार शिंदे गटाशी संपर्कात असून, त्यांच्या पक्षप्रवेशाच्या हालचालींना वेग आला आहे.

सूत्रांच्या माहितीप्रमाणे, एकनाथ शिंदे यांनी पंतप्रधान नरेंद्र मोदी आणि गृहमंत्री अमित शाह यांची भेट घेत आगामी रणनीतीवर चर्चा केली आहे. या भेटीचा मुख्य अजेंडा ठाकरे गटाच्या खासदारांचा शिंदे गटात प्रवेश करणे हाच असल्याचे सांगितले जात आहे. पक्षाचे संख्याबळ वाढवणे आणि संघटनात्मक मजबुतीसाठी शिंदेंनी हे विशेष मिशन हाती घेतले आहे.

शिंदे गटाने फक्त चर्चाच नव्हे, तर संभाव्य खासदारांच्या नावांची यादी तपासून कायदेशीर तज्ज्ञांशी सल्ला घेतला आहे, जेणेकरून पक्षांतराच्या वेळी कोणतीही तांत्रिक अडचण येऊ नये, असेही समजते. दुसरीकडे, संजय राऊत यांनी यावर कडक प्रतिक्रिया दिली आहे. राऊतांनी सांगितले, “आमचे निष्ठावान लोकप्रतिनिधी कुठेही जाणार नाहीत. ज्यांनी घोटाळे केले आहेत, ते ईडी-सीबीआयच्या भीतीने तिकडे गेले आहेत. आमच्या खासदारांना विकासनिधी दिली जात नसल्याने अडवणूक केली जात आहे.”

ठाकरे गटाचे लक्षवेधक 9 खासदार रडारवर

जर पक्षांतर झाले, तर ठाकरे गटाला लोकसभेत मोठे खिंडार पडण्याची शक्यता आहे. 2024 मध्ये ठाकरे गटाचे निवडून आलेले 9 खासदार आहेत:  अरविंद सावंत (दक्षिण मुंबई) अनिल देसाई (दक्षिण मध्य मुंबई) संजय दीना पाटील (ईशान्य मुंबई) संजय जाधव (परभणी) ओमराजे निंबाळकर (धाराशिव) भाऊसाहेब वाकचौरे (शिर्डी) राजाभाऊ वाजे (नाशिक) संजय देशमुख (यवतमाळ-वाशीम) नागेश पाटील-आष्टीकर (हिंगोली) यापैकी कोणते खासदार शिंदे गटाच्या रडारवर आहेत, हे अद्याप स्पष्ट झालेले नाही.

शिंदे सेनेचे निवडून आलेले खासदार

श्रीकांत एकनाथ शिंदे, नरेश गणपत म्हस्के (ठाणे), रवींद्र दत्ताराम वायकर (मुंबई उत्तर पश्चिम), श्रीरंग अप्पा चंदू बारणे (मावळ), प्रतापराव गणपतराव जाधव (बुलढाणा), संदीपनराव आसाराम भुमरे (संभाजीनगर), धैर्यशील संभाजीराव माने (हातकणंगले) हे खासदार शिंदे यांच्या नेतृत्वात निवडून आले आहेत. राजकीय तज्ज्ञांच्या मते, जर उबाठाचे खासदार शिंदेंच्या गटात आले, तर एकनाथ शिंदे यांच्या पक्षाची दिल्लीत ताकद लक्षणीयरीत्या वाढू शकते.