बंगालच्या उपसागरात निर्माण झालेल्या वादळी प्रणालीचे ‘अक्वान’ चक्रीवादळात रूपांतर झाले असून, त्याची तीव्रता आणखी वाढण्याचा अंदाज भारतीय हवामान विभागाने वर्तविला आहे. हे चक्रीवादळ १९ नोव्हेंबरपर्यंत अतितीव्र चक्रीवादळात रूपांतरित होण्याची शक्यता आहे. त्यानंतर २० नोव्हेंबर रोजी आंध्र प्रदेशच्या किनारपट्टीवर धडकण्याचा अंदाज आहे. या वादळामुळे आंध्र प्रदेश, ओडिशा, तामिळनाडू आणि पश्चिम बंगालसह पूर्व किनारपट्टीवरील भागांत मुसळधार पावसाची शक्यता आहे.
भारतीय हवामान विभागाच्या ताज्या माहितीनुसार, १६ नोव्हेंबर रोजी बंगालच्या उपसागरातील खोल दाबक्षेत्राचे ‘अक्वान’ चक्रीवादळात रूपांतर झाले. हे वादळ सध्या दक्षिण आणि पश्चिम-मध्य बंगालच्या उपसागराच्या परिसरात सक्रिय आहे. ते वायव्य दिशेने सरकत असून, १७ नोव्हेंबरच्या संध्याकाळपर्यंत तीव्र चक्रीवादळात रूपांतरित होण्याची शक्यता आहे. १९ नोव्हेंबरच्या सकाळपर्यंत त्याची तीव्रता आणखी वाढून अतितीव्र चक्रीवादळात रूपांतर होऊ शकते.
हवामान विभागाच्या अंदाजानुसार, २० नोव्हेंबर रोजी दुपारच्या सुमारास नेल्लोर आणि तुनीदरम्यान आंध्र प्रदेश व यानम किनारपट्टी ओलांडण्याची शक्यता आहे. यावेळी वाऱ्याचा वेग ताशी १२० ते १३० किलोमीटर, तर झोतांचा वेग ताशी १४५ किलोमीटरपर्यंत पोहोचू शकतो. त्यामुळे किनारपट्टीवरील भागांना सतर्कतेचा इशारा देण्यात आला आहे.
या चक्रीवादळाच्या प्रभावामुळे तामिळनाडू, पुद्दुचेरी, आंध्र प्रदेश आणि ओडिशाच्या काही भागांत जोरदार पाऊस होण्याची शक्यता आहे. समुद्रकिनारी वाऱ्याचा वेग वाढण्यासह समुद्र खवळण्याची शक्यता असल्याने मच्छीमार आणि किनारपट्टीवरील नागरिकांनी हवामान विभागाच्या सूचनांचे पालन करणे आवश्यक आहे.
दरम्यान, महाराष्ट्रात सध्या अंशतः ढगाळ हवामानासह कमाल आणि किमान तापमानात चढ-उतार कायम राहण्याचा अंदाज आहे. राज्यातील काही भागांत थंडीचा कडाका वाढू लागला असून, बदलत्या हवामानामुळे नागरिकांना तापमानातील बदल जाणवण्याची शक्यता आहे.










