कोल्हापूर, वृत्तसंस्था : कोल्हापूर जिल्हा सहकारी दूध उत्पादक संघ अर्थात गोकुळच्या सत्तासंघर्षात आता राज्य सरकारने हस्तक्षेप केल्याने राजकीय वातावरण तापले आहे. संघावर राज्य सरकारकडून पाच स्वीकृत संचालकांची नियुक्ती करण्यात आल्याने नव्या वादाला तोंड फुटले आहे. या नियुक्त्यांमुळे गोकुळचा ताबा मिळवण्याचा सरकारचा डाव असल्याचा आरोप काँग्रेस नेते सतेज पाटील यांनी केला आहे. दुसरीकडे, मंत्री हसन मुश्रीफ यांनी विरोधकांच्या आरोपांवर प्रत्युत्तर दिल्याने हा वाद अधिकच चिघळण्याची चिन्हे आहेत. विशेष म्हणजे, या पाच स्वीकृत संचालकांना सहकारी संस्थांच्या निवडणुकांमध्ये मतदानाचा अधिकारही देण्यात आल्याची माहिती आहे.
गोकुळच्या निवडणुकीत एकूण २५ जागांपैकी महायुतीच्या पॅनेलला १२, तर सतेज पाटील यांच्या नेतृत्वाखालील पॅनेलला १३ जागांवर विजय मिळाला. त्यामुळे सत्तेचे गणित सतेज पाटील यांच्या बाजूने झुकल्याचे चित्र निर्माण झाले होते. मात्र, अध्यक्षपदाच्या निवडीसाठी आवश्यक असलेला १४ संचालकांचा कोरम पूर्ण होऊ न शकल्याने अध्यक्ष निवडीची प्रक्रिया रखडली. या परिस्थितीत महायुती आणि समविचारी गटाने संभाव्य दगाफटका टाळण्यासाठी आपल्या १२ संचालकांना सहलीवर पाठवण्याचा निर्णय घेतला.
सरकारच्या निर्णयाने राजकीय समीकरणे बदलली
गोकुळमधील सत्तासंघर्ष सुरू असतानाच राज्य मंत्रिमंडळाच्या बैठकीत पाच स्वीकृत संचालकांच्या नियुक्तीचा निर्णय झाल्याने राजकीय समीकरणांना नवे वळण मिळाले. या नियुक्त्यांमुळे संघातील सत्तेचे गणित बदलण्याची शक्यता व्यक्त केली जात आहे. सरकारने गोकुळचा ताबा मिळवण्यासाठीच हा निर्णय घेतल्याचा आरोप सतेज पाटील यांनी केला आहे. या नियुक्त्यांच्या कायदेशीर वैधतेवरूनही वाद निर्माण झाला असून गोकुळचा प्रश्न न्यायालयात पोहोचला आहे.
महायुतीचे संचालक उदयपूरमध्ये असल्याचा दावा
दरम्यान, महायुतीचे १२ संचालक अलिबागमध्ये असल्याची चर्चा सुरू होती. मात्र, सतेज पाटील यांनी एका मुलाखतीत वेगळीच माहिती दिली आहे. महायुतीचे संचालक गोवा आणि सुरतमार्गे उदयपूरला पोहोचल्याचा दावा त्यांनी केला. हे सर्व संचालक उदयपूरमधील मॅरिएट हॉटेलमध्ये वास्तव्यास असल्याचेही त्यांनी सांगितले.
संबंधित संचालक हॉटेलच्या पहिल्या मजल्यावर असून त्यांच्या खोल्यांचे क्रमांकही आपल्याला माहिती असल्याचे सतेज पाटील यांनी म्हटले आहे. तसेच सर्व संचालकांकडून प्रतिज्ञापत्रावर सह्या घेण्यात आल्याचा दावाही त्यांनी केला. त्यामुळे अध्यक्षपदाच्या निवडीपूर्वी संचालकांच्या हालचाली आणि राजकीय डावपेचांना वेग आला आहे.
हसन मुश्रीफ यांचे आरोपांना प्रत्युत्तर
सरकारच्या निर्णयावरून सतेज पाटील यांनी टीका केल्यानंतर मंत्री हसन मुश्रीफ यांनी विरोधकांच्या आरोपांना प्रत्युत्तर दिले आहे. स्वीकृत संचालकांच्या नियुक्तीवरून सत्ताधारी आणि विरोधकांमध्ये आरोप-प्रत्यारोप सुरू झाले आहेत. त्यामुळे गोकुळचा अध्यक्ष कोण होणार, पाच स्वीकृत संचालकांच्या नियुक्तीचा सत्तेच्या गणितावर काय परिणाम होणार आणि न्यायालयात या प्रकरणाचा काय निकाल लागणार, याकडे संपूर्ण कोल्हापूर जिल्ह्याचे लक्ष लागले आहे.
