सातारा, वृत्तसंस्था : राज्यात जिल्हा परिषद आणि पंचायत समिती निवडणुकांच्या पार्श्वभूमीवर साताऱ्यात महायुतीतील भाजप आणि शिवसेनेच्या (शिंदे गट) संघर्षाची चर्चा रंगली होती. जिल्हा परिषद अध्यक्षपदाच्या निवडीवेळी दोन्ही पक्षांतील तणाव उघडपणे समोर आला होता. या घडामोडींदरम्यान मंत्री शंभुराज देसाई यांना पोलिसांकडून धक्काबुक्की झाल्याचा प्रकारही घडला होता. आता जिल्हा मध्यवर्ती सहकारी बँकेच्या निवडणुकीच्या निमित्ताने हा जुना वाद पुन्हा उफाळून आल्याचे चित्र दिसत आहे.
जिल्हा मध्यवर्ती सहकारी बँकेच्या निवडणुकीतील घडामोडींवर भाष्य करत शंभुराज देसाई यांनी नाव न घेता भाजप नेते तथा मंत्री जयकुमार गोरे यांच्यावर निशाणा साधला होता. जिल्हा परिषद निवडणुकीतील जखम जिल्हा मध्यवर्ती बँकेच्या निवडणुकीत भरून निघाल्याचे वक्तव्य त्यांनी केले होते. त्यांच्या या विधानामुळे साताऱ्यातील महायुतीमधील राजकीय संघर्षाला पुन्हा हवा मिळाली आहे.
त्यामुळे जिल्हा परिषद निवडणुकीनंतर शांत झालेला भाजप आणि शिवसेनेतील वाद जिल्हा मध्यवर्ती बँकेच्या निवडणुकीच्या निमित्ताने पुन्हा चर्चेत आला असून, मंत्री शंभुराज देसाई आणि जयकुमार गोरे यांच्यातील राजकीय वार-पलटवार वाढण्याची चिन्हे दिसत आहेत.











